| descargar en pdf | castellán – catalán – gallegu – euskera – inglés |
Les persones que mos dedicamos a cuntar histories xunímonos pa unviar un mensaxe d´apoyu y solidaridá a tola sociedá por cuenta la crisis prevocada pola enfermedá del coronavirus, COVID-19.
Comu los personaxes de los meyores cuentos, topámonos metanes una biesca pertrupa cola sensación de que´l llobu escluca na escuridá. Pero sabemos que nun tamos solos porque siempre va apaecer dalquién que va aidanos a salir de la biesca o del bandullu del llobu. Nesta historia toos y toes cuntamos y la nuesa solidaridá, puxu y cuidáu colectivu son los nuesos conxuros contra´l virus y los sos efeutos.
De xeito que les y los contadores d´histories pedímovos que cuntéis, inventéis, lleáis y sintáis cuentos, casos o sucedíos
pa engañar al tiempu,
pa viaxar ensin salir de la casa,
pa rir o tremar coles aventures mas ablucantes,
pa alcordase de les persones mayores y toles histories que mos tienen cuntao,
pa mos reconocer n´allegría, la murnia o´l mieu,
pa dexar que, un intre, el mundu siga xirando y que nun importe mas nada que tar xuntos y esti intre.
Pola nuesa banda, vamos seguir inventando y cuntando cuentos nes nueses cases y al traviés de les redes. Y nun sabemos aínda la fin d´esta historia nin tampoco si vamos comer perdices, pero sí sabemos que´l mieu que sentimos ye compartíu y nun mos fae menos valientes, fáenos mas humanos y fráxiles.
Comu los personaxes de los meyores cuentos, dalgún día, en pasando too esto, tresformáremonos y tendremos histories nueves pa cuntar.
Porque la narración de cuentos ye un ungüentu pa los díes d´encierru con miles d´años d´eficacia prebada y que, otra vuelta, ha xunir a la humanidá alredor del fueu, demientres dure la nueche.
Esti manifiestu igüóse´n marzu de 2020 por cabezaleros de toles asociaciones de narración oral d´España: AEDA, Asociación de profesionales de la narración oral de España – ANIN, Associació de narradores i narradors (Cataluña) – GNOA, Gremio de la narración oral en Andalucía – MANO, Asociación madrileña de narración oral – NANO, Narradors amb narradores organitzats (Comunidad Valenciana) – NOGA, Colectivo de narración oral galega – TAGORAL, Asociación canaria de narración oral.
